2Begiekin

Gauzaez hasi ohi gara 

Xalo

malats

gomuta barik.

mehar zabaltzen zaizkigu begiak

oro eta dena gertagarri dela sinestuta.

munduaren hatsarrea da

hain bizkor doakigun …. dagoeneko joan den hori

Behatzen hasi eta atoan

kontzientzia isiotu egiten da

nor izaten hasten gara

edo zer

alegia, edozer.

eta garenak gorpu azkortzerakoan jabetzen gara:

atzo ere bagarela.

Gauza ñiminoetan dago zoriontasuna deitzen dugun zera hori.

Ez du behar suziririk

ez hotsandirik

Maiz,

jenderik ere ez du behar.

Beharbada 

lauzatu gorri bat

eta argi-txintaren beroa.

Herioak jabaltasuna inarrosten ez zuen aro bat egon zen.

Artean, joanak beti ziren eskapuak

asagokoak, besteenak.

Nireak, ez.

Beti-betiko-betikotasuna

berbak bazuen lekurik gure geurea zen hiztegian.

Beti: Amaierarik ez /Sinonimoa: Eternitatea.

Aspaldian

Existentzia eta bere hutsartea gauza bera zirenean.

Gerizpeak

Itzalatasuna edo…

-keria

Beti ez da beti;

eternitatea is out

dagoeneko iraungitze datarik badugu.

(Nork jakin nahi du iraungitze-data?)

Malkoek alatzen dute haragia sakonerarik ez duten kraterrak eraginez

MInaren bideak markak uzten dizkigute

barrurik barrenenean desokupazioak maite ditugunen izen-abizenak daramatza

Dagoeneko

eskelak

irakurtzen

hasi

naiz.

Z

  A

    I

      N

HIzki batek dena alda lezake.

Z

  E

     I

       N

Andraize marmarra,

arrasti usaina.

artatxorien txioen aranotsak.

Lainoek marrazki gorrixkak egiten dituzte.

Bizitzaren suetena da.

Zer egingo zenuke bizitzaren azken liparretan ospitaleko ohe batek bahiturik bazintu?

Zer, heriotza zu bezain erreala balitz?

Zer, medikuak  ”egia nahi duzu” galdetuko balizu…?

…azken guda dantza balitz…?

…akabukoa…

…Zer?

Desirak 11 forma izan litzake.

7 aurpegi + 1.

-edozein musuren atariko diren ezpain haragitsuak,

-zure begietan pausatzen den so herabea

-hitzen sinfonia zuzentzen duen esku zozkotsua.

Ahots 1 ere bihur daiteke desiogarri

IZAN liteke 

berba egiteko era, esaldi eraikidura.

Eta berriz ere barrua leher liezazuketen ezpain mardokiak.

Iheska egiten dizuten begi berdeak

eta haizeak mardotzen duen boza.

Umela giroa

Ateri, parke honetan.

euria dakar.

Aterkin gorria sakelean.

11 arrazoi eman nitzake desiorako:

1

2

3

4

5

6

7

8

9

10

ZU.

Granadondoak

bere baitan darama

negarra;

zalutuezina.

ihartezina.

Mendebaldea du sartzaiera gautu egiten gaituen itzalak 

Argia itzungi ahala hotzak hartzen du espazio oro

Inbasioak erakuts ezin litezkeen ziegatutako munstroak askatu ohi ditu.

Atea noiz zabalduko zain dauden mamu eskergaroak

Marrumaka eta murrusaka latzikararen atariko dira

Gauzain izan nahi duzu orduan

jabetzen zaren arte:

Zu zara munstro horiek.

Zer izango du buruan drogatokiko atarian behearen gain umelean jesarrita dagoen gizonak?

Barruratzerakon zeri begiratuko dio lehenago xiringari ala kafe beroari?

Bigarren pisuko emakumeak goizeko orduko txikietan telebista amatatzen duenean beldurrik sentituko al du?

Andamioetan jauzika dabiltzanek zein mendi eta horma esturekin egiten dute amets?

Hirurogeita hamarretik gorako bikotearen oheko zein tokitan egongo da pasioa?

Itsasertza goitik begiratzen duten kalatxoriek non emango dute gau hotz hau?

Auzokideen ume txikiaren ametsetan mamurik zitalena zein ote den imajina dezake bere amak?

Bizitzaren hustasunak benetan bete litezke?

Ordu txiki hauetan esna dagoen beste norbaitek pentsatzen al du mundua handiegia dela, bakardadea gordinegia eta kantu bat izan daitekeela geratzen zaigun itxaropen bakarra?